Bizkaian, bola-jokoak goraldi handia izan zuen XIX. mendeko azken hamarkadetan eta XX. mendeko lehenengoetan. Garai hartan, auzoek bolatoki bana zuten ia-ia, eta, bertan, pitxerrean edaten ari ziren txakolinaren edo sagardoaren inguruko apustua egiten zuten. Pasaboloaren urrezko urteak izan ziren, gainera, erronka zein apustu ospetsuak egiten ziren Bizkaia eta Kantabriaren artean.

Bizkaian erroldatutako hamabost joko-modalitateen bilakaera oso desberdina izan da ezarpen-mailaren, jardueraren eta barruko antolamenduaren arabera. Elorrion, hiru txirloko modalitate arruntean jokatzen dute. Probintzia arteko modalitate federatua da, eta urteko ligako txapelketetan jokatzen da.

 Jokalariak bi kiloko bola jaurtiko du, biraka, lurraren arrasetik, eta, irteerako oholean talka egin ondoren, irristaketa-pista zeharkatuko du kale-eremuan erori gabe. Bertan, hiru txirloak botatzea izango da azken helburua. Txirlo batekin beste txirlo bat botatzea ere balekoa izango da.